Curacao a confirma mas di 20 Cabai cu lo bin pa Interpaso 2011

“Rivalidad den un esfera caballistico”

E dianan ta asercando y tur e preparacionan necesario ta tumando lugar pa e magno evento di Interpaso 2011. For di nos hermana isla di Curacao a haya confirmacion caba cu 20 di nan miho ehemplarnan lo yega Aruba cu barco den e siman di 23 di September, pa asina batalla fuertemente contra nos cabainan local. Manera por compronde Aruba a bay cu mayoria di e premiacionan durante e Inter 2011 na Curacao lo cual a pone cu e caballistanan di Curacao a sali busca refuerso pa combati cu Aruba y nan a trese cabainan nobo for di Puerto Rico y Colombia. E mensahe ta cu Corsow ta biniendo todo por todo back pa asina tuma revancha y recobra nan e titulonan.

Despues di e Inter 2011 cierto caballistanan di Curacao a importa varios ehemplar di caliber y nan a duna resultado den e ultimo competencia local na Corsow y awor nan ta cla pa bin competi nan durante Interpaso 2011. Entre nan ta Gitana del Potrico y Caneco di Criadero C.J y La Exclusiva di Don Ak. Na Curacao La Exclusiva ta un tremendo yegua cu actualmente ta 10 luna priña di e exitoso cabai Grimaldi, cu por cierto a wordo invita for di Colombia pa bin competi na nos Interpaso 2011.

Na Aruba mes tur e caballistanan ta bezig ta train nan ehemplarnan intensivamente pa asina por duna un bon presentacion. OCA no tion duda cu Interpaso lo ta e evento pa atende, ya cu e aña aki e atraccionnan lo ta superior di aña pasa. OCA lo tin un banda cada dia di Interpaso 2011. Dia 30 September lo tin actuiacion di OREO, dia 1 di 2 Oktober ta turno di DURO y Diadomingo atardi dia 2, Rincon Boyz lo grita “Porfin tin un Homber” na Villa Floralina ex-Rancho Monte Blanco. E

INSCRIPCION PA INTERPASO TA DIASABRA

Grimaldi a hasi super bon na Cucuta

Grimaldi ta sigui den preparacion pa Interpaso 2011 y el a caba di corona su mes como Gran Campeon Reservado na e feria di Cucuta, cu ta e ciudad fronterisa cu Colombia. E donyo di “Grimaldi de la Hispaniola” ta di Republica Dominicano, pero e ta acompanya e cabai unda cu esaki bai y no ta skiet di dje. E ehemplar aki ta hopi conoci den e mundo di cabainan di paso fino. Te asina lew cu nos sa e ta e unico cabai cu a jega di gana den 4 diferente pais y na e momento aki e ta hasiendo un “tour” na Colombia unda e la logra varios campeonato importante caba.

E yiu di Joyero I y Karina de Portefino (yiu di Profeta de Besilu) a competi den e competencia di Cucuta siman pasa contra varios di e miho cabai nan di Colombia y Venezuela. Den e oportunidad aki e la gana den su categoria di cabai nan mayor di 78 luna y despues e la competi den e Campeonato cu e potro Acertijo de JS, cu ta un di e cabainan cu mas a gana e anja aki na Colombia. Acertijo di Rionegro a corona su mes Gran Campeon mientras cu Grimaldi a keda cu e premio di Gran Campeon Reservado.

Aruba ta ansioso pa wak Grimaldi fin di e luna aki na Aruba, compitiendo contra e miho cabainan di Aruba y Curacao den Interpaso 2011.

Den preparacion pa Interpaso, OCA lo duna oportunidad di inscripcion pa Interpaso 2011 diasabra awor di 8:00 te 10:00 or di anochi na Rancho La Ponderosa. Pa inscribi mester yena un formulario y paga e suma di inscripcion, cu ta 75 florin pa competencia di e Clasico, 55 pa e competencia paseo y capon, 40 florin pa jinete y amazona.

<

OCA tambe ta acepta pa inscribi via e-mail, pero mester tene na cuenta cu e pago mester ta aden pa Diasabra sea on line, personalmente cerca e tesorero Magdala Wever of riba e anochi di inscripcion.

E chens ta grandi cu e cabainan di Corsow lo sali pa Aruba, Dialuna awor, pero esaki ta depende riba e bapor cu ta yuda OCA tur aña pa hasi e transport. E animo di caballistanan di Corsow ta fabuloso y ta spera algun cien yiu Corsow den e fin di siman na Aruba. Fuera cu Corsow a hanya un set di cabai nobo cu a entusiasma nan, e animo tambe ta sinta den e hecho cu e feria di aña pasa a laga hopi di nan ta lamenta cu nan no a bin Aruba y perde un di e mihor exposicionnan equino y ambiente caballista di historia.

Pa loke ta jinete y amazona ta biniendo tanto di Corsow como di Venezuela hobennan pa competi. E nivel di competencia na Aruba ta hopi halto y ta un ehercisio cu tur pais kier pone riba nan agenda.

Criadero CJ di Corsou a manifesta di ta cla pa Interpaso 2011

Interpaso 2011 tey atrobe!

Dia 30 di September, October 1 y 2 ta reserva pa e anual y tradicional gran evento di cabaynan di paso na Aruba. Despues di e exito asina grandi di aña pasa pa e celebracion di 25 aña di Interpaso, e interes y animo den exterior a crece di tal indole cu no a keda e directiva di OCA mucha alternativa si no ta di tene un feria equino igual e aña aki.

Tur cos ta mustra cu e feria di e aña aki lo bira ainda mas grandi. Den e fin di siman cu a pasa Aspafico di Corsou a tene un competencia di cabay specialmente den preparacion di nan participacion na Aruba. Aki por bisa cu Criadero CJ a arasa ! Despues cu Cai Jersurun, doño di Criadero CJ na Curacao a adkiri varios cabay nobo den exterior, ayera el a wak e fruto ora cu su cabaynan a haci un super bon papel. “Santa Maria Tsunami”, cabay Moro yiu di e Campeon Mundial Tormento de la Virgina cu a wordo treci di Bogota, Colombia a titula su mes Gran Campeon di Paso Fino diasabra anochi na e escenario di competencia. E anochi di macho tabata pa e linea di Tormento, ya cu e ex-presidente di Aspafico, Norman Hugo su ”Detalle de Tormento” a bira e Gran Campeon Reservado. E ehemplar aki a yega Corsou di Puerto Rico tambe un par di siman atras.

Mientras cu den yewa e titulo di Gran Campeona y e Gran Campeona Reservada tambe a bay pa Criadero CJ cu e yewa “Gitana de Portico” cu a yega solamente un par di siman prome for di Puerto Rico. E Reservada a bira “Porcelana de CJ” cu ta un cria di Curacao mes. E hues di e anochi tabata Diego Gonzalez di Puerto Rico. E feria a wordo organisa riba e tereno propio di e organisado, ya cu Aspafiko a haya nan propio tereno y den e fin di siman nan a strena e facilidad cu e feria pre-Interpaso. E competencia a wordo dedica na Eddy Felipa, kende ta un personahe cu pa masha hopi aña ta trahando pa bienestar di e deporte na Corsou. Esey ta nifica cu Corsou ta den full preparacion y kier bin duna Aruba un les. OCA tin prepara pa e 3 dianan di feria un banda grandi di musica pa cada dia y fuera di esey un cantidad di atraccion manera weganan pa mucha, tentnan cu yen di cos di bende, estilo mercado di purga, pero tambe un food-court cu un total di 4 diferente cushina cu platonan di cuminda di diferente pais. Interpaso ta bolbe mustra un evento cu ningun hende por faya.

Promocion di Interpaso 2011 na Hit94 FM

Promocionando Interpaso 2011 den grandi

Riba diamars 13 di septemeber e vocero di OCA cu ta den persona di Etline Tromp a wordo entrvista door di sr. Jhonny Habibe di e canal radial Hit94 FM. Durante e entrevista aki, Etline a haya e oportunidad di splika tur lokua ta e evento di Interpaso 2011. OCARUBA.COM kier a haci uso di e oportunidad aki pa pasa e entrevista…