Shoko Ranch ta yama bonbini na un bunita potranca…

Diahuebs dia 16 di Juni Aruba a hanya su prome potranca di aña 2011

“Mecanica” ta e yegua cu a brinda Aruba su prome potranca. E potranca di color alazan tin “Chino Azul” (Capuchino x Borrasca) como tata, mientras cu e moro Mecanica ta yiu di Soñador den La India Impura. Criador di Chino Azul ta Tom Pietersz mientras cu Mecanica tin Herman Nahar como su criador.E ehemplar a nace na Shoco Ranch, cu di e forma aki a recibi su di dos cria di e aña aki. E prome 6 ehemplarnan cu a nace e aña aki ta potro, loke ta pone cu Chino Azul y Mecanica a kibra e ritmo aki. E potranca no a hanya un nomber ainda.

Competencia di cabay e weekend aki na Rancho Ponderosa

Hopi expectativa pa cu e competencia di propetarionan

Aña pasa e deporte di Paso Fino tabatin un gran exito cu Interpaso 2010 y awor sigur por spera un tremendo competencia durante Nacional 2011. E expectativanan ta grandi atrobe pa e aña aki y ya por bisa cu e inscripcion a capta hopi atencion, pasobra ya tin casi 80 participante cu a inscribi pa e gran competencia di e fin di siman aki.

Aruba mester sinti su mes masha orguyoso di tin asina tanto participante den e deporte aki, ya cu e ta un deporte cu sigur ta contribui na e imagen di Aruba den e mundo di Paso Fino, cu ta un deporte sumamente bunita y fascinante. Mester remarca cu actualmente tin 19 participante, sea Jinete of Amazona, cu ta principiante y esey ta demostra e gran interes y crecemento den e deporte aki na Aruba. E cabaynan di diferente Rancho di nos isla lo ta presente, p’asina e miho Jinete of Amazona bataya pa e titulonan maximo den Nacional di Aruba.

E competencia ta tuma luga diasabra 16 di april iniciando pa 5or di atardi y diadomingo 17 di april e competencia lo inicia pa 3or di atardi. Tanto e bar como e cushina lo ta bon surti pa tur hende y e entrada ta completamente gratis. Pues considera esaki como un invitacion y bin pasa un rato ameno den ambiente familiar y disfruta di un tremendo competencia di Paso Fino, un deporte cu ta hayando hopi atencion entre nos hobennan di Aruba.

CABALLISTANAN Y CUIDADORNAN DI BESTIA TAMBE POR YUDA PARA E AMENASA DI SCHROEFWORM

OCA kier a pone e siguiente na conocemento di su miembronan.

Manera boso lo a lesa of tende caba, na Aruba nan a registra varios caso di schroefworm, cu ta algo cu no a manifesta su mes desde 2004. Como cu e enfermedad aki ta peligroso tambe pa cabai ta bon pa tur propietario, cuidador y chalan ser extra atento y observador pa constata na tempo si e mester manifesta su mes, prome cu e causa mas danyo na e ehemplar.

Basa riba experiencia di pasado y den un combersacion cu dr. Peter Barendsen, por accentua cu e schroefworm por afecta cualkier bestia cu tin herida door cu e mosca ta pone su webo den e herida y for di e webo ta sali bichi cu ta cuminsa come den e herida. E bichinan ta laga un buraco masha fini atras caminda cxu ela drenta, pero bao di e cuera e ta cuminsa hasi e danyo. E ta cuminsa come e carni bao di e cuero di tal moda cu e no ta visibel di afo. Segun e bai comiendo e ta crea manera un cueba bao di e cuero, causando un danyo grave na esun afecta. E fenomeno aki no ta unicamente peligroso pa galiña, cacho, pushi, cabrito, cabai, pero tambe pa e humano si e descuida e herida.

Tene na cuenta cu potronan recien pari tambe por ta vulnerabel na e parti di nan lombrishi, si esaki no full seco y curra.Animalnan cu tin herida ta bon pa spuit e herida cu awa mas di un biaha pa dia pa asina laba e posibel webonan. Si ta posibel feita rond di e herida pa evita cu sushi di sanger of serum por bira un neishi pa webo. Pone aloe y otro repelente tambe ta yuda den sentido preventivo. Claro ta bon pa trata na tapa e herida si e sitio ta permiti, pero no lubida pa hacie limpi tur dia y pone gasa fresco.

Si tin bestia cu herida fastioso ta bon pa sera e stal cu un mosquitero (net fini) pa tene mosca afo. Trata tambe ta elimina tur loke por yuda mosca pa broei. Aplica remedi riba e herida segun description. Esun cu ta recomendabel ta “ciperclor”, cu ta un spray cu ta mata e webo y e bichi y ta obtenibel na clinica Contreras y Booi.

Servicio veterinario ta pidi cu si hanya caso di schroefworm pa raporta esaki y trata na colecta muestra den un pochi y entrega esaki servicio veterinario pa asina por laga examine clinicamente. Caballistanan tin un responsabilidad importante. Ta masha importante pa preveni a todo costo pa schroefworm bira un epidemia, ya cu fuera di ta peligroso, e lo pone henter Aruba bao di cuarentena cu lo no por sali cu cabai for di nos isla y tampoco importa cabainan cu despues mester bai back pa exterior. OCA ta spera di a informa su miembronan suficientemente.

“ESCANDALO” Y “TARTARINA” TA CAMPEONNAN DI COPA BETICO

“Expresso” y “Yerbabuena” a bai cu e Reservado

ORANJESTAD, Aruba – 8 di februari 2011: Cada competencia tin su complicacion y su sorpresa y den e competencia equina pa Copa Betico esey no tabata diferente. Tin ehemplar a comporta nan mes malo, otro a presenta manca y otro cu no a bin mes, door cu nan ta recien pari y a haci dificil pa drenta trailer, pero esey ta cosnan di bida. Criadero Alma di Alex Mansur sigur por papia hopi riba esaki y su montado Dairo Jimenez tabatin un complicacion tras di otro. E gran exito a bay pa Villa Floralina di Eric y Patsy Mansur, kendenan tambe a bira e miho expositor di e competencia y nan chalan Alex Cybul a bay cu e titulo di miho montado. E sorpresa di miho criado a bay pa Hermanos Merryweather, aunke cu nan no a competi pero e cabaynan cu a nace di nan cria si a haci un bon papel den e feria.

Den yewa paso fino e competencia tabata mas interesante. Den e campeonato (final) Tartarina di Eric Mansur y Alex Cybul tabata un clase aparte. Esun mas cerca cu por a molesti’e cu ta Lirica di Alex Mansur, a ser excusa pa motibo cu su man drechi tabata resenti. Ora cu e grupo di 61 pa 77 luna di edad a topa Tartarina a gana di Yerbabuena de Alto Vista y a laga Cantata de la Luisa di Jeannette Bruin na di 3 luga.

Den yewa por menciona cu e hues a saca Anaconda di Alex Mansur como cu e no tabata den su paso y esey tambe tabata e caso di Mision di famia Werleman.

Topando den e final Tartarina monta pa Alex Cybul a bolbe mustra cu e ta superior na Yerbabuena y a bira e Gran Campeona y Yerbabuena monta pa Dairo Jimenez a bira e Gran Campeona Reservada. Den e campeonato a competi ademas Serenata y Emperatriz, ambos di Lucho Claro y Rematadora di Jeannette Bruin. Den macho e sorpresa mas grandi tabata cu Ritmico di Alex Mansur no por a drenta pista como cu e tabata hopi coho di un pata. Esey a habri caminda pa Escandalo di Patsy Mansur pa raspa. Monta pa Alex Cybul, e cabay a haci un bon papel den su categoria. Expresso di Gregory Oduber y monta pa Guillermo Higuita a mantene su mes serio pa termina na di dos luga y ora cu nan dos a topa den e campeonato, hues Juan Carlos Palencia a mantene e mesun secuencia pa otorga Escandalo e titulo di Gran Campeon y Expresso esun di Reservado. Aramis, monta pa Dairo Jimenez a termina di 3 den su categoria, net dilanti di Soñador di Joby Henriquez y Guardaespalda di Gail y Detta Henriquez a keda cuarto.

Den e otro modalidadnan nos ta haya cu Presagio de Villa Victoria di Mark Bruin a bira e Gran Campeon di Trote & Galope. E Gran Campeona ta Tania Maria di Nelson Richardson.

Den trocha Teoria de la Luisa di Eric Mansur a bira e Gran Campeona. Shahari no a presenta, ya cu e ta recien pari. Eos di Alex Mansur a bira e Gran Campeon. Mescos cu den trote, aki tambe tabatin un solo ehemplar den cada categoria y door di esey no tabatin contienda pa e puesto di reservado. E siguiente competencia di cabay ta fiha pa 19 y 20 di Maart.