OCA TA ANUNCIA INTERPASO PA SEPTEMBER 30

Grimaldi y Flor de la Canela entre e cabainan di Colombia Masha interes di Corsow y Venezuela pa jinete y amazona

Directiva di OCA kier anuncia na su miembrecia cu e fecha di Interpaso 2011 a keda oficialmente fiha pa September 30, October 1 y 2 na Villa Floralina.

Originalmente directiva kier a hasi un evento menos grandi cu esun di aniversario, pero e impacto di aña pasa te ainda ta hasiendo un efecto grandi riba caballistanan di exterior y ta riba nan insistencia a dicidi pa bolbe hasi un feria den grandi. Caballistanan di Colombia, Corsow y Venezuela a cuminsa puntra cu insistencia pa informacion y con lew OCA ta cu su fecha y preparacion. Corsow a anuncia cu nan ta anticipa un participacion di 25 cabai. Di Colombia ta mencionando nomber di ehemplarnan manera “Grimaldi”, monta pa Alvaro Atahualpa, cu ta multiple Gran Campeon di paso fino, e yiu di tera “Flor de la Canela”, monta pa Gonzalo Franco cu tin un man yen di Gran Campeonato den trote y galope y “Samoa”, cu ta un yegua Gran Campeon di paso fino na Venezuela y despues na Colombia a bira e Reservada na 2008 den Feria de las Flores y ta monta actualmente pa Jaime Villegas un conocido na Aruba cu a monta algun aña pa Dan Oduber na Rancho Daimari.

OCA ta serando contract cu bandanan popular pa tur tres dia di feria tin un banda musical pa anima e publico, pero lo tin tur e atraccionnan y actividadnan cu ta hasi un evento mas popular, manera un fila di restaurant cu cumindanan varia y atractivo, mercado di purga, weganan pa mucha y atraccionnan pa e publico den intermedio di e competencia.

Claro cu e accento ta keda riba competencia di cabai y pa medio di esaki ta solicita y invita tur caballista pa cuminsa traha un plan pa prepara nan cabainan pa e gran evento aki. Ningun hende por debati cu no tin nada mas bunita cu di mira den un gran cantidad di categoria un ring yen di cabainan bunita. Nos tur sa cu no ta tur cabai por gana. Tambe nos sa cu tur caballista por duna su contribucion pa laga e feria mustra como algo unico y entre e mihornan den nos region. E promocion internacional cu Aruba a hanya anja pasa di e plantanan di television cu a cubri e evento ta enorme y inpagable. Lunas despues di e feria ainda tabata ripiti Interpaso riba nan sistema di kabel. E expectativa pa e competencia di jinete y amazona ta enorme. Aunke cu aña pasa awasero a yobe asina fuerte cu mester a cancela un parti grandi di e competencia di e hobennan, tog tanto Corsow como Venezuela a hasi un apelacion grandi pa e biaha aki atrobe por hasi un evento grandi, ya cu nan ta cla pa participa. Corsow a keda masha contento cu Interpaso ta cai den vakantie ya nan por bin Aruba pa un periodo mas largo. Di Venezuela tambe a bin solicitud pa OCA yuda busca alohamiento apropia pa e jinete y amazonanan. E evento di jinete y amazona por bira mucho mas grandi si tin mas cabai cu e bishitantenan por hanya pa competi. Pesey mes OCA ta poco cauteloso den hasi publicidad den e direccion ey.

Shoko Ranch ta yama bonbini na un bunita potranca…

Diahuebs dia 16 di Juni Aruba a hanya su prome potranca di aña 2011

“Mecanica” ta e yegua cu a brinda Aruba su prome potranca. E potranca di color alazan tin “Chino Azul” (Capuchino x Borrasca) como tata, mientras cu e moro Mecanica ta yiu di Soñador den La India Impura. Criador di Chino Azul ta Tom Pietersz mientras cu Mecanica tin Herman Nahar como su criador.E ehemplar a nace na Shoco Ranch, cu di e forma aki a recibi su di dos cria di e aña aki. E prome 6 ehemplarnan cu a nace e aña aki ta potro, loke ta pone cu Chino Azul y Mecanica a kibra e ritmo aki. E potranca no a hanya un nomber ainda.

Competencia di cabay e weekend aki na Rancho Ponderosa

Hopi expectativa pa cu e competencia di propetarionan

Aña pasa e deporte di Paso Fino tabatin un gran exito cu Interpaso 2010 y awor sigur por spera un tremendo competencia durante Nacional 2011. E expectativanan ta grandi atrobe pa e aña aki y ya por bisa cu e inscripcion a capta hopi atencion, pasobra ya tin casi 80 participante cu a inscribi pa e gran competencia di e fin di siman aki.

Aruba mester sinti su mes masha orguyoso di tin asina tanto participante den e deporte aki, ya cu e ta un deporte cu sigur ta contribui na e imagen di Aruba den e mundo di Paso Fino, cu ta un deporte sumamente bunita y fascinante. Mester remarca cu actualmente tin 19 participante, sea Jinete of Amazona, cu ta principiante y esey ta demostra e gran interes y crecemento den e deporte aki na Aruba. E cabaynan di diferente Rancho di nos isla lo ta presente, p’asina e miho Jinete of Amazona bataya pa e titulonan maximo den Nacional di Aruba.

E competencia ta tuma luga diasabra 16 di april iniciando pa 5or di atardi y diadomingo 17 di april e competencia lo inicia pa 3or di atardi. Tanto e bar como e cushina lo ta bon surti pa tur hende y e entrada ta completamente gratis. Pues considera esaki como un invitacion y bin pasa un rato ameno den ambiente familiar y disfruta di un tremendo competencia di Paso Fino, un deporte cu ta hayando hopi atencion entre nos hobennan di Aruba.

CABALLISTANAN Y CUIDADORNAN DI BESTIA TAMBE POR YUDA PARA E AMENASA DI SCHROEFWORM

OCA kier a pone e siguiente na conocemento di su miembronan.

Manera boso lo a lesa of tende caba, na Aruba nan a registra varios caso di schroefworm, cu ta algo cu no a manifesta su mes desde 2004. Como cu e enfermedad aki ta peligroso tambe pa cabai ta bon pa tur propietario, cuidador y chalan ser extra atento y observador pa constata na tempo si e mester manifesta su mes, prome cu e causa mas danyo na e ehemplar.

Basa riba experiencia di pasado y den un combersacion cu dr. Peter Barendsen, por accentua cu e schroefworm por afecta cualkier bestia cu tin herida door cu e mosca ta pone su webo den e herida y for di e webo ta sali bichi cu ta cuminsa come den e herida. E bichinan ta laga un buraco masha fini atras caminda cxu ela drenta, pero bao di e cuera e ta cuminsa hasi e danyo. E ta cuminsa come e carni bao di e cuero di tal moda cu e no ta visibel di afo. Segun e bai comiendo e ta crea manera un cueba bao di e cuero, causando un danyo grave na esun afecta. E fenomeno aki no ta unicamente peligroso pa galiña, cacho, pushi, cabrito, cabai, pero tambe pa e humano si e descuida e herida.

Tene na cuenta cu potronan recien pari tambe por ta vulnerabel na e parti di nan lombrishi, si esaki no full seco y curra.Animalnan cu tin herida ta bon pa spuit e herida cu awa mas di un biaha pa dia pa asina laba e posibel webonan. Si ta posibel feita rond di e herida pa evita cu sushi di sanger of serum por bira un neishi pa webo. Pone aloe y otro repelente tambe ta yuda den sentido preventivo. Claro ta bon pa trata na tapa e herida si e sitio ta permiti, pero no lubida pa hacie limpi tur dia y pone gasa fresco.

Si tin bestia cu herida fastioso ta bon pa sera e stal cu un mosquitero (net fini) pa tene mosca afo. Trata tambe ta elimina tur loke por yuda mosca pa broei. Aplica remedi riba e herida segun description. Esun cu ta recomendabel ta “ciperclor”, cu ta un spray cu ta mata e webo y e bichi y ta obtenibel na clinica Contreras y Booi.

Servicio veterinario ta pidi cu si hanya caso di schroefworm pa raporta esaki y trata na colecta muestra den un pochi y entrega esaki servicio veterinario pa asina por laga examine clinicamente. Caballistanan tin un responsabilidad importante. Ta masha importante pa preveni a todo costo pa schroefworm bira un epidemia, ya cu fuera di ta peligroso, e lo pone henter Aruba bao di cuarentena cu lo no por sali cu cabai for di nos isla y tampoco importa cabainan cu despues mester bai back pa exterior. OCA ta spera di a informa su miembronan suficientemente.